📖BIBLIOTECA PARA NAIS, PAIS E EDUCADORAS: "¿QUÉ OCURRE EN EL CEREBRO DE LAS NIÑAS Y NIÑOS DURANTE EL CONFINAMIENTO?"

“¿QUÉ OCURRE EN EL CEREBRO DE LAS NIÑAS Y NIÑOS DURANTE EL CONFINAMIENTO?” por  Vincenç Arnaiz Sancho

Vincenç Arnaiz Sancho, psicólogo e especialista no ámbito da educación infantil.

O relatorio divídese en dous bloques principais:

- Un primeiro bloque onde explica que é o que ocorre no cerebro das crianzas: como funciona o sistema límbico, que acontece se funcionamos no “modo alarma” (abandono do gozo, activación do sistema de vixilancia, reaccións, tensión muscular, o esgotamento debido ao mantemento sostido no tempo do estado de estrés...).

- E un segundo bloque que trata de dar resposta a que facer nestes momentos, é dicir, como podemos compensar esta situación de sufrimento:

Sublíñanse 4 elementos clave de protección ou auto-protección cando chegamos a ese estado de alarma: capacidade de ledicia, capacidade de tenrura, vínculos familiares e redes sociais (importancia do grupo máis alá da familia).

Trata aspectos esenciais a ter en conta e levar a cabo como pai/nai/persoa adulta responsable das crianzas: mantemento do seu propio benestar, controlar entrada de información, quendas de coidado entre proxenitores ou adultas a cargo, orde na casa (tempos, horarios, anticipación...).

Tamén afonda nos aspectos a ter en conta sobre que facer coas crianzas: atender ao factor tempo (facer devagar, xa que a calma vai da man da tenrura, previsibilidade, establecemento de proxectos, calendario familiar, diario, marcar inicio e finalización de actividades...), atender aos coidados persoais e do grupo, favorecer a autonomía das crianzas, importancia do movemento consciente, manter relacións sociais activas e participar no coidado da casa.

O noso sincero agradecemento a Vincenç Arnaiz por esta conferencia, organizada polo Concello de Xàbia (Alicante), que dirixiu ao profesorado e familias de educación infantil o 23 de abril de 2020.