🤸 🤸‍♂️ XOGOS DE MOVEMENTO PARA CRIANZAS. ACTIVIADES PARA FACER NA CASA: A PROCURA DOS OVOS

NA PROCURA DOS OVOS

Propoñémosvos para estes días un xogo de movemento e moito máis, no que as crianzas terán que atopar un tesouro. 

Para conseguilo terán que axudar á galiña a atopar os seus ovos.

Estes ovos podedes facelos debuxándoos en calquera tipo de papel. Podedes usar unha forma ovoide ou circular, o que vos pareza máis sinxelo (as crianzas verán igualmente ovos durante o xogo).

Podedes agochar os ovos por toda a casa: no cesto dos xoguetes, entre os libros, baixo a cama... É preferible que haxa algúns moi visibles para animar ás crianzas na procura, e outros un pouco máis ocultos.

Unha vez que os atopen deberán ordenalos (empregando os números que aparecen en cada un deles) e ler a mensaxe secreta. 

Unha vez lida deberán adiviñar cal é a localización do tesouro.  No xogo que vos propoñemos, a adiviña “da moitas voltas e sempre molla”, levará ás crianzas a mirar na lavadora, onde estará o tesouro*.

Para facilitarvos a preparación do xogo, podedes facer un esquema inicial co número total de letras (ovos) que vos fará falta recortar.

Animádevos a preparar este xogo, a diversión está asegurada!

*O "tesouro" que agacharedes na lavadora dependerá do que teñades pola casa e dos gustos dos vosos fillos e fillas. As nosas propostas, para non ter que mercar nada, son:

- Un biscoito, galletas, madalenas...

- Algunha forma de chocolate sinxela como letras do seu nome, formas xeométricas, pingas... ou máis complexa como pitiños, galiñas, coellos... 

Para facer estas formas derretede chocolate no micro, ou nunha ola ao baño maría, e botádeo sobre papel de forno (se non tedes podedes empregar moldes de silicona, ou un prato liso untado de aceite. Esperade a que o chocolate arrefríe e se endureza de novo.