🤸 🤸♂️ XOGOS DE MOVEMENTO PARA CRIANZAS. ACTIVIADES PARA FACER NA CASA: MOVÉMONOS Á PAR
MOVÉMONOS Á PAR
Este é un xogo de coordinación, onde tamén se poñen en acción a atención, o control corporal, memoria, organización espacial... Moverémonos sobre un “taboleiro sinxelo improvisado” e as crianzas terán que imitar os nosos movementos nun taboleiro igual ao noso, permanecendo sempre fronte a nós.
Acordade con eles/as como construílo. Podedes empregar follas ou cartolinas de cores. Se non tedes ese material, podedes colorear follas brancas e construílo por vós mesmas/os. Outra opción é que, en lugar de cores, empreguedes debuxos sinxelos.
Facede primeiro movementos sinxelos: pisamos o violeta e volvemos ao comezo, a crianza repite imitándonos. Despois pisamos o verde e volvemos ao comezo, e a crianza fai o mesmo movemento no seu taboleiro... Podedes complicar un pouco esta fase inicial do xogo, completándoa con movementos diferentes: podemos pisar cos dous pés, podemos poñer só un pé, podemos apoiar unicamente o talón ou unicamente a punta do pé...
Podedes complicar aínda máis a este xogo se non facedes movementos globais, é dicir, se cada movemento se corresponde só cunha parte do corpo, por exemplo: pé esquerdo amarelo – pé dereito rosa.
Animádevos tamén a que sexan as crianzas as que propoñan os movementos ou as secuencias e sede as persoas adultas as que as imiten, cambiando así os roles. Así terán que ser eles/as as que creen e imaxinen novas posibilidades.
Esta proposta pódese adaptar tamén para facérmola sentadas no medio do taboleiro, e serán as mans as que se movan de maneira coordinada creando secuencias.
O traballo corporal e movemento desenvolve destrezas e habilidades como atención, concentración, creatividade, capacidade de pensamento, resolución de problemas, axilidade, rapidez, flexibilidade.
David Bueno i Torrens
Comentarios
Publicar un comentario